Xabier Madariaga izango da gaurko gonbidatua 'Gure Kasa' saioan

Xabier Madariaga kazetari eta 'Ur Handitan' saioaren aurkezlea elkarrizketatuko dute, gaur gauean, Julen eta Antton Telleriak 'Gure Kasa' saioan. Herritarroi interesa eta kezka pizten duten gertuko gizarte gai asko jorratu dituzte saio honetan. Oraingoan, berriz, atzerrian jarri dute begirada, eta munduko zortzi herrialde zeharkatu dituzte, bertan bizi dituzten gai eta egoerak ezberdinak lantzeko asmoz.

Esperientzia honen inguruan eta orain arte egindako lanaz mintzatuko da kazetari bilbotarra. Horrez gain, ETBko artxiboan dituen bideo bitxienak ekarriko dizkigu Nerea Aliasek, tartean, telebistan lehen aldiz agertu zenekoa; Naiara Gagorekin jolasean arituko dira, eta Onintza Enbeitak udazkenari buruz hitz egingo digu.

Iban Garcia kalera joan da, eta challenge ezberdinak egiten aritu da jendearekin. Herritarrek proposatu eta berak egin, edo ahalegindu, behintzat.