Belako musika taldea, gaur arratsaldean, "Biba Zuek!" saioan

Gaurko "Biba Zuek!" saioan Belako musika talde bizkaitarra izango dute gonbidatu. Duela 10 urte baino gehiago sortu zen taldea eta, hasieran bertsioak egiten bazituen ere, laster hasi ziren euren musika sortzen. 2012an Gaztea Maketa Lehiaketa irabazi zuten, eta lau disko argitaratzeaz gain, kontzertu ugari eskaini dituzte. Oraingo honetan azken lana aurkeztuko dute: Plastic drama diskoaren "Deluxe Edition" biniloa, apirilaren 8an argitaratuko dutena. Gainera, "Belako pandemic tour 2020" dokumentala ere izango dugu hizpide Maddalen Arzallusekin eta Xabier Sukiarekin.

Aurretik, saioaren lehen orduan, guraso bakarra izatearen gaia landuko dute. Horretarako, hainbat gonbidatu izango dituzte, eta bakoitzak bere esperientzia nola bizi duen kontatuko du. Izan ere, oraindik asko dago egiteko familia hauen lege edo arauen inguruan.

18:00etatik 20:00etara izango dugu ikusgai "Biba Zuek!" saioa ETB1n eta eitb.eus-en.