Yurre Ugarte idazle eta gidoigilea, gaur, "Arte[faktua]" saioan

Yurre Ugarte idazle eta gidoigile tolosarra hartuko dute gonbidatu larunbat honetako "Arte[faktua]" saioan. Lilurabera (Alberdania argitaletxea) da bere azken liburua, zortzi ipuin askez osatutakoa. Hauetako ia protagonista guztiak emakumeak eta artistak, sortzaileak dira. Beraien bitartez, pop kulturaz eta honek sortzen duen liluraz hausnartu du egileak liburuan zehar. Ugarte Irunen bizi da egun, eta bertako Olaberria auzoko Trinkete Borda jatetxean elkartuko da Yolanda Mendiolarekin.

Jorge Gimenez Bech idazle, itzultzaile eta Alberdaniako editorea batuko da Ugarte eta Mendiolaren arteko solasaldira. Berorrek egin ditu Lilurabera liburuaren edizio lanak, beraz, prozesu horretaz eta Ugarteren idazketaz arituko dira, besteak beste.

Aste honetan, Irakurlea-ren atalean, Maddi Zubeldia idazleak Lucien Etxezaharretaren Begira liburuaz hitz egingo digu.

Bestalde, Irakurketa artea tartean, Ainhoa Agirreazaldegi bertsolari elgetarrak, bertso bat ahots goraz irakurtzean kontuan hartu beharreko alderdiez hitz egin eta bertso bat eskainiko du.

Horretaz gain, Olatz Oroz 2020ko Maria Markotegi Sarietako parte-hartzaileak, Agatha Christieren Eta ez zen alerik ere geratu liburuaren gomendioa egingo du.

Hau guztia, saioa osatzen duten Galdetegia, pitxiak, nobedadeak eta liburu-denden gomendioekin batera,gaur, 13:00etan, ETB1en eta eitb.eus-en.