Idoiak Josean kanporatu eta berdeak beste kolpe latz batetik libratu ditu

"El Conquistador" saioaren hamaseigarren edizioko lehiakiderik beteranoena kanpoan dago. Joseanek Gasteizerako bidea hartu du, Idoiak azken edizioetako duelurik gogor eta lehiakorrenetarikoan kanporatu baitu. 5. atalean, ez galtzeko apustu ausarta egin zuten berdeek, eta jokaldi biribila egin zuten. Hori bai, oso nekatuta itzuli da Idoia kanpamentu oso txirora. Hamarreko bana duelura joan direnentzat eta beste bikain bat Nekanerentzat, bere aholku eta animoekin garaipenera bultzatu baitzuen bere kidea.

Enekok kideetako bat galdu du, Joseanek berak duelura joateko egindako eskaria egin ostean. Hala erabaki zuen Joseanek, immunitate jokoan huts egin zuelako. Denbora handia galdu zuen kaiolan soka erretzeko orduan, eta gorriek erraztasun handiak izan zituzten ikurrinera lehenak iristeko. Caguama taldeko gainerako kideek ia ez zuten tutik esan Joseani boluntario eskaintzeko kezkak kentzeko, eta kanporatzeko arriskuan utzi zuten.

Horrez gainera, Guaraguao taldeko kideen ospakizuna polemikoa izan zen, gorrien eta urdinen artean hika-mikak izan baitziren. Gotzonek poz handiz ospatu zuen garaipena eta taldea kanpamentu aberatsera eraman zuen. Gorriek janaria lortu zuten azkenik eta lo seko geratu ziren "fucking paradise"ko oheetan. Hainbeste erlaxatu ziren, ezen sua itzali egin zitzaiela goizaldean.

Berdeek, bitartean, larrutik ordaindu dute sua pizterako orduan izan duten baldartasuna, eta historiako kanpamenturik txiroenean egin dute penitentzia. Patrik oso gaizki abiatu du bere bigarren parte-hartzea eta talde berdeko kideak bere hutsak ordaintzen ari dira. Neskek berriro jarri zuten arriskuan Nekane, eta "Izan Invictus"ko lehiakide ohia taldekideen taktikarekin gogaitzen ari da. Ikusteko dago zer gertatuko den berdeek beste immunitate proba bat galtzen badute; baliteke taldeak eztanda egitea.

Ez ezazu galdu "El Conquistador del Caribe", astelehenetan, 22:30ean, ETB2n eta eitb.eus-en. Gainera, saioaren atalak EiTB Nahieranen ikus daitezke.