telebista
Kirolak zuzenean
Buruz Buruko Txapelketako finala, gaur, zuzenean, ETB1en eta eitb.eus-en
EiTB
Mikel Urrutikoetxearen eta Iker Irribarriaren arteko final handiaren atarian eta ondoren saio berezia egingo dute ETBko kiroletako lankideek Bizkaia pilotalekutik bertatik.
Informazio gehiago (1)
ETB1ek eta eitb.eus-ek zuzenean eskainiko dute Mikel Urrutikoetxearen eta Iker Irribarriaren arteko Buruz Buruko Txapelketako finala. Euskal Telebistak Bilboko Bizkaia pilotalekutik egingo duen emanaldia 17:00etan hasiko da atariko saio berezi batekin, eta finala amaitutakoan segida izango du, norgehiagokak eman duena aztertzeko.
Lau t'erdiko eta binakako finaletako lan-talde berdina arituko da eginbehar honetan: Pedro Mari Goikoetxea gidari, eta Abel Barriola, Mikel Idoate eta Juan Mari Juaristi Atano XIII.a iritzi-emaile lanetan. Bestalde, Xabier Euzkitzek eramango du jaialdiaren kontakizunaren gidaritza, Joxean Tolosa lagun duela. Elena Azpeitiak eta Ibon Gaztañazpik bilduko dituzte eguneko protagonisten hitzak eta armailetako giroa.
Final handiaren aurretik, binakako partida bat izango dugu ikusgai: Olaizola II - Albisu vs Elezkano II - Zabaleta.
Beste hiru kirol emanaldik osatuko dute igandeko kirol eskaintza ETBn eta eitb.eus-en: Biharko Izarrak Torneoa (12:00, ETB4), palako Open Bizkaiako finalerdiek (14:00, ETB4) eta lur gaineko 640 kiloko sokatira finalak (16:00, ETB1).
