telebista
Kirol emanaldiak
Gaur arratsaldean, Eibarko pilota jaialdia, zuzenean, ETB1en eta eitb.eus-en
EITB
Gainera, pilota afizionatuen Olazar Txapelketa finalak eta aizkora eta harri-jasotzearen banakako kopa finalak izango dira ikusgai.
Gaur, Urteberri egunean, Eibartik zuzenean eskainiko dute ETB1ek eta eitb.eus-ek pilota jaialdia. Bengoetxea VI- Larunbe eta Altuna III- Martija bikoteek binakako txapelketa partida jokatuko dute eta gainera, Retegi-Jaunarena/ Jaka-Erostarbe eta Elordi- Merino/ Errandonea- Lasa norgehiagokak ere izango dira ikusgai. Xabier Euzkitzek, Joxan Tolosak eta Xabier Anduezak egingo dute kontakizuna, 17:00etatik aurrera.
Pilotaren aurreko 'Herri Kirolak' tarteak Asteasun aurreko egunean ospatutako aizkora eta harri-jasotzearen banakako Kopa finalak eskainiko ditu, Ibon Gaztañazpi eta Jose Etxebeste esatarien eskutik.
Amaitzeko, ETB4k eta eitb.eus-ek pilota afizionatuen Olazar txapelketa finala eskainiko dute, 12:00etan, Iñigo Aiestaran eta Enrique Aguirrebeitiaren kontakizunarekin.
