Gaur amaitzen da 'El Conquis 2015' castingera bideoa igotzeko epea

'El Conquistador del Fin del Mundo'-ren aurtengo edizioa historia da jada, eta saioko lantaldea 2015eko edizioan pentsatzen ari da dagoeneko.

Aurrez aurreko castingak uztailaren erdialdera bukatu ziren. Dena den, abentura saioan parte hartu nahi duenak online castinga egin dezake oraindik. Horretarako, uztailaren 31a baino lehen, eitb.eus-era aurkezpen bideo bat igo besterik ez du egin behar. Bideo horretan norbere burua aurkeztea eskatzen dizuegu, eta 'Conquistador'-en zergatik nahi duzuen parte hartu esatea. Saioari buruzko iritzia ematea ere eskertuko dugu: probak, kapitainak, aukezlea, eszenatokiak... Hau da, norbere burua Conquis-eko lehiakide izateko saltzea da bideo honen helburua.

Adibide gisa, ikusi 7. edizioa irabazi zuen Nakor Marquezen aurkezpen bideoa.

Aurrez aurreko casting arrakastatsuak

'El Conquis' saioko lantaldea bi astez izan zen Hego Euskal Herriko lau hiriburuetan aurrez aurreko castingak egiten. Uztailaren 4an, Iruñean izan zen; uztailaren 7an, Gasteizen; 8an eta 9an, Donostian; eta 10ean eta 11n, Bilbon.

Saioko arduradunen esanetan, hautagai gehienak 18 eta 22 urte arteko mutilak izan ziren, baina adinez helduagoak direnak ere egon ziren, aurreko edizioetan baino gehiago.

Mutilak neskak baino gehiago izan ziren. Dena den, arduradunek nabarmendu zuten nesken kopurua handitu egin zela. "Urtero bezala, denetariko hautagaiak daude. Hala ere, aurkeztu diren nesken artean oso maila altua dago", gaineratu zuten.

Casting jardunaldi jendetsuak izan ziren lau hiriburuetan. Argazkia atera eta inprimakiak bete ondoren, hautagaiek kamera aurreko aurkezpenari eta galderei egin behar izan zieten aurre. Sekretua naturaltasunez jokatzea eta zintzotasunez erantzutea omen da.

Espiritu abenturazalea izatea eta kirola eta bidaiatzea gustuko izatea eskatuko zaie parte-hartzaileei, baina mota guztietako lehiakideen bila dabiltza arduradunak: kirolariak eta fisikoki indartsuak direnak, umoretsuak eta erakargarritasunen bat dutenak... Denek dute 'El Conquistador del Fin del Mundo' saioko hamaikagarren edizioko lehiakide izateko aukera.