Gipuzkoa Basket
Garaipena luzapenean
Lagun Arok bizirik jarraitzen du 'playoff'ean (86-82)
Erredakzioa
Talde gipuzkoarrak final-laurdenetako hirugarren partida behartu du luzapenean partida osoan zehar aurretik joan den Valentzia gaindituta.
Fitxa teknikoa:
86.- Lagun Aro GBC: Neto (12), Papamakarios (6), Panko (13), Baron (14), Betts (5)- hasierako bostekoa-, Salgado (10), Doblas (21), Vidal (5), Lasa, Lorant, Ogide.
82.- Valencia Basket: De Colo (13), Claver (6), Canler-Medley (11), Pietrus (7), Markovic (17)- hasierako bostekoa- Dean (11), San Miguel, Ogilvi (1), Newley (6), Faverany (7), Rafa Martinez (3).
Lagun Aro GBCk Valentzia Basket gainditu eta playoffetako hirugarren partida behartu du. Gipuzkoarrak luzapenean nagusitu dira 86-82ko markagailuarekin. Norgehiagoka intentsitate handikoa izan da.
Opari gehiegi eman dizkio Sito Alonsoren taldeak Valentziari aurreneko minutuetan, baina aurreneko laurdena bukatzeko minutu baten faltan berpiztu egin da taldea hein handi batean Doblas, Vidal eta Saldago jokalariei esker eta laurdena 19-25 bukatu da.
Perasovicen taldeak defentsa sendoa ezarri du eta erasoan ondo aritu da. Lagun Arok, ordea, kostata saskiratu du. Atsedenaldian, hamaika puntuko zen bisitarien abantaila (31-42). San Sebastian Arena haserre agertu da epaileen erabakiekin.
Lagun Arok ondo hasi du hirugarren laurdena, partidaren kontrola eskuratzea izan du helburu eta bost puntura hurbildu da markagailuan (41-46), baina Turiakoek maila onari eutsi diote eta azken laurdenaren hasieran hamar puntuko abantailarekin ziren (52-62).
Gipuzkoarrek dena eman dute azken laurdenean eta partida bukatzeko minutu bat falta zenean Pankok sartutako saskiratze libreak markagailua berdindu (71-71) eta luzapena behartu du. Salgado eta Neto izan dira gakoak.
Luzapenean etxekoak nagusitu dira eta asteartean, Valentzian, final-laurdenetako hirugarren partidako jokatuko dute Lagun Arok eta Valentzia Basketek. Doblas izan da neurketako saskiratzaile onena 21 punturekin.
