Pilota
Eusko Label Winter Series
Urrutiak eta Basquek Erkiaga eta Ibarluzea menderatu dituzte, hiru jokotan, ikusgarria izan den partidan
EITB MEDIA
Hala, Thomas Urrutiak eta Thibault Basquek B multzoko lehenengo postua lortu dute, Eusko Label Winter Seriesen. Astelehenean jokatutako beste partidan, Johanek eta Lekerikak Olharan-Zabala bikotea mendean hartu dute, hiru jokotan ere.
-
Urrutia eta Basque, zaleen artean, garaipena eskuratuta. Argazkia: EITB Media.
Thomas Urrutiak eta Thibault Basquek Aritz Erkiaga eta Ion Ibarluzea menderatu dituzte, hiru jokotan, 15-13, 12-15 eta 5-2, eta Johan Sorozabalek eta Unai Lekerikak Jean Olharan eta Jon Zabala mendean hartu dituzte, hiru jokotan ere, 15-6, 12-15 eta 5-3, 2024-25eko Eusko Label Winter Serieseko hamargarren jardunaldian, B multzoan, astelehenean, Gernika-Lumoko Jai Alai pilotalekuan. Hala, Urrutiak eta Basquek B multzoko lehen postua eskuratu dute, txapelketako aurreneko fasean, jokatutako hiru partidak irabazita, eta Johanek eta Lekerikak, Winter Seriesen izan duten azken norgehiagokan, lehenengo garaipena erdietsi dute.
Hala, ikusgarria izan den partidan, Urrutiak eta Basquek Erkiaga eta Ibarluzea garaitu dituzte. Bi bikoteak nor baino nor gehiago arituko dira astebete barru, urtarrilaren 6an, finalerdietako ligaxkako lehen jardunaldian, eta Donibane Garaziko aurrelariak eta Bidarteko atzelariak konfiantza handiagoaz helduko diote horri, garaipen hau eskuratuta. Jai Alaiko zaleek biziki gozatu dute partidaz, tanto bikainak izan baititu, eta emozio eta parekotasun handia izan baitira. Hirugarren jokoan, azkenik, Urrutiak eta Basquek garaipena erdietsi dute.
Astelehenean jokatutako beste partidan, Johanek eta Lekerikak garaipena lortu dute, eta amaiera ona eman ahal izan die txapelketari; izan ere, Olharan eta Zabala menderatu dituzte, hiru jokotan. Aurreneko jokoan, irabazleak argi nagusitu dira, 15-6, baina bigarrenean, ordea, Olharan eta Zabala suspertu egin dira, eta berdinketa jarri dute, 15-12 gailenduta; zortzi tantoko aldea ere izan dute, 12-4koan. Johanek eta Lekerikak, hori bai, indartsu bukatu dute jokoa, hori galdu arren, eta hirugarren jokoan gehiago asmatu dute, 5-3 irabazita.
Johan eta Lekerika, norgehiagoka bukatuta. Argazkia: EITB Media.
