Lau t'erdikoa
Material aukeraketa
Altunak faboritotzat du Urrutikoetxea, baina bizkaitarra ez dago ados
Agentziak | Erredakzioa
"Ez dakit berak zer esango duen, baina pilota munduan dabiltzatenek badakite faboritoa dela", esan du gipuzkoarrak material aukeraketaren ostean.
Mikel Urrutikoetxeak ez du uste igandeko Lau t’erdiko finala irabazteko faborito nagusia denik, Jokin Altunak horrela adierazi arren. Bi pilotariek indarrak neurtuko dituzte igandean, Bilboko Bizkaia pilotalekuan.
Bizkaitarra eta gipuzkoarra Miribillan izan dira, final handirako pilotak aukeratzen. Ez dute arazorik jarri aurkeztutako materialarekin.
"Ez dakit berak zer esango duen, baina pilota munduko guztiek dakite faboritoa bera dela. Txapelketa bikaina egin du, eta bere ibilbideko momenturik onenean da", esan du Altunak pilota aukeraketaren osteko prentsaurrekoan.
Aurretik, Urrutik esan du ez duela bere burua faborito ikusten, eta, orain arte "ondo" aritu den arren, aurretik egindakoek ez dutela "ezertarako balio" gaineratu du.
Zaratamoko pilotariak esan du finalera "ondo" iristen dela, baina ezkerreko eskuan hautsita duen atzamarrean molestia txiki batzuk dituela. Urrutikoetxeak urriaren 27an Iñaki Artolaren aurka final-laurdenetan jokatutako partidan hautsi zuen atzamarra.
