Realak bigarren garaipena jarraian lortu nahi du Rayoren aurka

Realak Rayo Vallecanoren aurka jokatuko du gaur 21:00etan, Anoetan. Bigarren garaipena jarraian lortu nahi dute txuri-urdinek, lehena Anoeta eraberrituan. Rayo ia bi urte t'erdi geroago itzuliko da Anoetara, azken aldiz 2016ko maiatzaren 8an jokatu baitzuen, eta galdu egin zuen mailari eusteko aukerarik gabe geratu zelarik.

Huescaren aurkako partidan egotziak izan ziren Theo Hernandezek eta Juanmik ezingo dute jokatu, zigortuta baitaude. Gainera, min hartuta dauden Adnan Januzaj, Diego Llorente eta Sandro Ramirez ez dira jokatzeko prest egongo. Albiste ona da, ordea, Willian Jose hasierako hamaikakora itzuliko dela. Atean, giroa nahasita dago, eta Garitanok erabaki beharko du Rullik edo Moyak jokatzen duen.

Rayo ez dago bolada onean eta Alavesen aurka (1-5) jipoia jasotzetik dator. Michelek zuzentzen duen taldean Abdoulaye Bak ezingo du jokatu, zigortuta dagoelako, eta Gorka Elustondo baja da, min hartuta dagoelako. Emiliano Velazquezek ordezkatuko du Abdoulaye Ba. Elustondo ordezkatzeko Alvaro Medran edo Santi Comesaña zelairatu ditzake Michelek. Adrian Embarbak hasieratik jokatuko du Alvaro Garciaren ordez.

Ustezko hamaikakoak:

Reala: Rulli; Zaldua, Aritz, Moreno, Kevin; Illarramendi, Merino, Pardo, Zurutuza; Oyarzabal eta Willian José.

Rayo Vallecano: Alberto; Advincula, Amat, Velazquez, Alex Moreno; Kakuta, Imbula, Comesaña edo Medrán, Embarba; Trejo; etsa Raul de Tomas.

Epailea: Martinez Munuera.

Zelaia: Anoeta.

Ordua: 21.00etan.