Reala, ezustekoaren bila Bartzelonaren aurka

Realak ‘Tata’ Martinoren Bartzelonaren kontra jokatuko du gaur, 20:00etan, Camp Nou futbol-zelaian. Bi taldeek Txapeldunen Liga jokatzen dute, baina egoera oso ezberdinetan aurkitzen dira. Kataluniako taldeak Ligako norgehiagoka guztiak irabazi ditu, eta Europako txapelketa garaipenarekin hasi du. Jagoba Arrasateren gizonek Shakthar Donetsken aurka porrot mingarria jaso zuten, eta Ligan hiru partida daramatzate garaipenik ezagutu gabe.

Donostiako taldeak egoera irauli nahi du, eta baja garrantzitsuak eduki arren, Camp Nou estadioan sentsazioak berreskuratu eta emaitza ona lortu nahi du.

Vela eta Griezmann hegaletara itzuli daitezke, Bartzelonaren defentsa aurreratuari min gehiago egiteko. Alves eta Adriano erasora igotzen diren hegalekoak dira, baina txuri-urdinak gelditzeko brasildarrek lan gehiago egin beharko dute defentsan. Seferovicek eta Xabi Prietok jokoan parte hartu beharko dute, Barçaren defentsaren akatsak ondo aprobetxatzeko.

Esteban Granero, Elustondo, Mikel Gonzalez eta Carlos Martinez ez dira Bartzelonan egongo, baina Realak aurpegia eman ahal duela erakutsi nahi du. ‘Tata’ Martinok aldaketak egingo ditu hamaikakoan, eta Busquets zelairatuko du Cesc Fabregasen ordez.

Ustezko hamaikakoak:

FC BARTZELONA: Valdes; Alves, Pique, Mascherano, Adriano; Busquets, Xavi, Iniesta; Alexis, Messi eta Neymar.

REALA: Bravo; Estrada, Ansotegi, Iñigo Martinez, De la Bella; Markel, Xabi Prieto, Pardo; Vela, Seferovic eta Griezmann.