Real Madril-Bartzelona (1-2): Abantaila, Guardiolaren taldearentzat

Fitxa teknikoa:

1 - Real Madril: Casillas; Altintop, Sergio Ramos, Carvalho, Coentrao; Pepe (Granero, 80. minutuan), Xabi Alonso, Lass (Ozil, 66. minutuaN); Higuain (Callejón, 66. minutuan), Cristiano Ronaldo eta Benzema.

2 - Bartzelona: Pinto; Alves, Pique, Puyol, Abidal; Busquets, Xavi (Thiago, 86. minutuan), Iniesta; Cesc (Cuenca, 88. minutuan), Messi eta Alexis (Adriano, 82. minutuan).

Golak: 1-0, 11. minutuan: Cristiano. 1-1, 49. minutuan: Puyol. 1-2, 76. minutuan: Abidal.

Errege Kopako final-laurdenetako kanporaketa Bartzelonaren alde jarri da Guardiolaren mutilek 1-2koa eskuratu baitute Santiago Bernabeu futbol zelaian. Cristiano Ronaldok lortu du neurketako aurreneko gola lehen zatian, baina blaugranek markagailua irauli egin dute atsedenaldiaren ostean Puyolek eta Abidalek lortutako golei esker.

Real Madrilek erasoan bikain hasi du norgehiagoka eta partidako aurreneko gola 11. minutuan lortu du Cristiano Ronaldok. Kontraeraso ona egin dute zuriek eta Portugaleko jokalariak ederki gainditu du Pinto baloia hanka artetik sare barrura bidalita. Mourinhoren taldeak presioarekin jarraitu du gola lortu eta gero, baina Bartzelonak abagune argia sortu dite.

Lehenengo zatiko 15. minutuan Alexis txiletarrak zutoinera bidali du baloia eta 25. minutuan Casillasek kornerrera desbideratu behar izan du Messiren jaurtiketa. Guardiolaren mutilek berdinketa bilatu dute, baina aurrelari blaugranek ezin zain dute Iker Casillas atezaina gainditu.

Bigarren zatiko 3. minutuan lortu du Kataluniako taldeak 1-1ekoa. Puyolek sare barrura errematatu du korner erdiraketa eta Real Madrilek atzerapausoa eman du zelaian. Hala ere, Mourinhoren taldeak kontraerasoa bilatzen jarraitu du, baina Benzemaren errematea zutoinera joan da.

Bartzelona jaun eta jabe izan da neurketako bigarren zatian eta markagailua iraultzea lortu dute Abidalen golari esker. Frantziako jokalariari pase ederra eman dio Messik eta Casillas buruz burukoan gainditu du azken 1-2koa jartzeko. Azkenean Guardiolaren taldeak garaipen garrantzitsua eskuratu du Santiago Bernabeu futbol zelaian.