Bartzelona-Real Madril (5-0): Jipoia eta lidertza

Guardiolaren mutilek ederki hasi dute partida baloiaren jabetza mantenduz eta Real Madrid atzean sartuz. Xavi eta Iniestak ondo zuzendu dute blaugranen erasoa eta aukerak heltzen joan dira. Lehen zatiko bosgarren minutuan, messik zutoinera bidali du bere jaurtiketa, ezkerkada eder batekin. Bederatzigarren minutuan Xavik 1-0ekoa lortu du Casillas goitik gaindituz buruz burukoan.

Zuriek ezin izan dute baloiaren jabetza mantendu eta etxeko taldeak aukera anitz izan ditu gol gehiago sartzeko. Norgehiagokaren 17. minutuan Pedrok bigarrena egin du Bartzelonarentzat Villaren bakarkako jokaldi paregabe baten ostean. 2-ekoarekin merengeak gora joan dira golaren bila, baina katalanak sendo ibili dira defentsan. Mourinhoren taldeak sortu dituen aukera onenak, Di Mariaren zartako bat eta Cristiano Ronaldoren falta jaurtiketa bat izan dira.

Bigarren zatian Real Madrilek ez du tokia hartu zelaian eta Bartzelonak eroso agintzen jarraitu du. Villak 3-0ekoa egin du norgehiagokaren 54. minutuan Casillas ederki gaindituz jaurtiketa zehatz batekin. Hiru minutu geroago Villak berriz ere, 4-0ekoa jarri du etxekoentzat Madrilgo atezaina gaindituz. 4-0ekoarekin blaugranek eroso kontrolatu dute norgehiagoka eta Madrilek ezin izan du baloiaren jabetza hartu. Bartzelonako jokalariek duten trebezia erakutsi dute eta talde zuria nahi izan duten bezala kontrolatu dute.

Mourinhoren mutilek irudi kaskarra erakutsi dute bigarren zati osoan eta katalanek gol gehiago egin ahal izan dituzte. Bojanek aukera paregabea izan du 78. minutuan, baina Casillas adi egon da baloia desbideratuz. Partidako 90. minutuan sartu berria zen Jeffrenek 5-0ekoa egin du jokaldi eder baten ondorioz. Norgehiagoka bukatzear zegoela Sergio Ramosek txartel gorria ikusi du Messiri egindako sarrera gogor baten ondorioz.