Roversiok puntu garrantzitsua eskuratu du Osasunarentzat

Fitxa teknikoa:

1 - R. Zaragoza: Roberto; Pablo Alvarez, Mateos, Paredes, Obradovic; Pinter (Zuculini, 54. minutuan), Dujmovic; Lafita, Ruben Micael (Apoño, 79. minutuan), Luis Garcia (Edu Oriol, 79. minutuan); eta Helder Postiga.

1 - C.A. Osasuna: Andres; Marc Bertran, Roversio, Sergio, Damia; Puñal, Nekounam (Timor, 88. minutuan); Cejudo, Raul Garcia, Lamah (Manu Onwu, 57. minutuan); eta Nino (Annunziata, 83. minutuan).

Golak: 1-0. 85. minutuan. Helder Postiga; 1-1. 87. minutuan. Roversio.

Urrezko puntua lortu du Osasunak Romaredan ligako azken sailkatuaren aurka. Helder Postigak 1-0ekoa jarri du markagailuan partidako 85. minutuan, baina Roversio defentsak berdintzea lortu du 87. minutuan. Mendilibarren taldeak Europako postuetan jarraitzen du 39 punturekin.

Osasunak eta Zaragozak erritmo gutxiko lehenengo zatia jokatu dute Romaredan eta gol aukerak urriak izan dira. Damiak izan du neurketako aurreneko abagunea, baina jokalari katalanaren jaurtiketa zuzenean kanpora joan da (10. minutuan). Mendilibarren mutilek akatsak egin dituzte erasoan eta pixkanaka Andres Fernandezen ate ingurura hurbiltzen hasi dira Jimenezen gizonak.

Helder Postigak langara bidali du baloia 27. minutuan eta Aragoiko taldea erasoan murgildu da. Osasunak asko sufritu du Manolo Jimenezen taldeak sortutako kontraerasoak gelditzeko, baina Zaragozak ez du erasoan asmatu. Atsedenaldia heldu baino lehen, Lafitak abagune ederra izan du, baina jaurtiketa kanpora bidali du.

Zaragozako taldeak abagune onak sortu ditu bigarren zatiko aurreneko minutuetan, eta Lafitak, berriro, 1-0ekoa lortu ahal izan du; hala ere, erdilariaren jaurtiketak langa jo du neurketako 48. minutuan. Andres Fernandez atezainak gelditu erabakigarria egin du, baina Osasunak ezin izan du erasoan minik egin.

Emozioa norgehiagokako azkenengo bost minutuetan heldu du Romaredara. 85. minutuan. Helder Postigak 1-0ekoa jarri du markagailuan, baina 87. minutuan gorritxoek berdintzea lortu dute. Roversiok sare barrura bidali du baloia, korner erdiraketa errematatuta, eta Nafarroako taldeak 1-1ekoa eskuratu du. Azkenean, Osasunak puntu garrantzitsua lortu du Ligako azken sailkatuaren aurka.