Bartzelona-Osasuna (4-0): Kanporaketa, blaugranen kontrolpean

Errege Kopari agur esan beharko dio Osasunak Camp Nou futbol zelaian 4-0 galdu eta gero. Mendilibarren taldeak ez ditu gol aukerak aprobetxatu eta Bartzelonak erabakita utzi du kanporaketa. Cescek 2-0ekoa jarri du atsedenaldia baino lehen bi gol ikusgarri sartuta eta Messik norgehiagokako beste bi golak lortu ditu bigarren zatian.

Osasunak ondo hasi du norgehiagoka erasoan asko sakatzen eta Guardiolaren taldeari baloiaren jabetza lapurtzen, baina 1-0ekoarekin Bartzelona neurketako jaun eta jabe bilakatu da. Lehenengo zatiko 14. minutuan Cescek lortu du 1-0ekoa Xaviren pase eder bati esker eta golarekin Kataluniako taldeak Osasuna zelai erdian gainditzea lortu du. 2-0ekoa Fabregasek egin du 18. minutuan Asier Riesgo jaurtiketa eder batekin gaindituta.

Abantailarekin Bartzelonak eroso jokatu du eta Iruñeko taldea atzean sartu da kontraerasoa bilatzeko asmoarekin. Thiagok hirugarren gola lortzeko abagunea izan du, baina Riesgok ederki gelditu du jokalari blaugranaren saiakera. Atsedenaldia baino lehen Guardiolaren taldeak beste gol bat lortzeko aukera izan du, baina Pedroren jaurtiketa Riesgok gelditu du.

Guardiolaren taldeak arriskua hegaletatik sortu du atsedenaldiaren ostean Messi eta Cuencaren bitartez, baina Bartzelonak ez dite abagune argiak sortu aurreneko minutuetan.

Cejudok 2-1ekoa lortzeko aukera bikaina izan du 63. minutuan, baina gorritxoaren jaurtiketa indartsua kanpora joan da. Messi jokoan sartu da eta argentinarra erasoan abaguneak sortzen hasi da. 71. minutuan Leo Messik 3-0ekoa jarri du Camp Nou Futbol zelaiko markagailuan.

Asier Riesgok gelditu erabakigarriak egin ditu partidako azkenengo minutuetan eta Osasunak gola lorzteko aukerarik argiena izan du. Hala ere, Lamahen jaurtiketa indartsua gutxigatik kanpora joan da (83. minutuan). Neurketa bukatzear zegoela, Messik azken 4-0ekoa lortu du.

- Fitxa teknikoa:

4 - Bartzelona: Pinto; Alves, Mascherano, Pique, Puyol, Sergio Busquets, Xavi, Thiago; Cuenca (Alexis Sanchez, 74. minutuan), Cesc (Keita, 87. minutuan) eta Pedro (Messi, 59. minutuan).

0 - Osasuna: Riesgo; Damia, Lolo, Sergio, Raitala, Timor, Nekounam, Cejudo (Lamah, 68. minutuan), Annunziata (Ibrahima, 84. minutuan, Lekic eta Roberto Torres (Puñal, 71. minutuan).

Golak: 1-0: Cesc, 14. minutuan 2-0: Cesc, 18. minutuan. 3-0: Messi, 72. minutuan. 4-0: Messi, 91. minutuan.