Athletic Club
Zozketa igandean
34.955 bazkideren ilusioak, loteria-ontzia barruan
Erredakzioa
Igande honetan egingo da Kopako finalerako sarreren zozketa. 17.000 sarrera daude jokoan 35.000 bazkide baino gehiagorentzat.
Athleticek 17.000 sarrera zozketatuko ditu igande honetan Kopako finalerako (13:00etan). Zuri-gorriek FC Bartzelonaren aurka neurtuko dituzte indarrak maiatzaren 25ean, Vicente Calderonen. Gabonetako loteria-ontzia Ibaiganen da dagoeneko.
Nola izango da?
Izena emandako Athleticeko bazkide bakoitzak zozketarako zenbaki bat izango du. Esleitutako zenbaki guztiak ontzi batean sartuko dira zenbakidun bolen sistema jarraituz. Ontzitik ateratako zenbakia eta hurrengo 16.999 zenbakiak gorako hurrenkeran, izango dira saridunak, eta zenbaki horiekin esleitutako bazkideei 2012ko Kopako finalerako sarrera bana eskuratzeko eskubidea emango diote.
Eta zozketa eta gero, zer?
Zozketa egiten den egunean bertan, clubaren iragarki taulan eta web orrian argitaratuko ditu zozketan saritutako zenbakiak, eta, beraz, finalerako sarrera bat eskuratzeko eskubidea dutenak.
Sarrerak 2012ko maiatzaren 11tik 23ra (biak barne) jaso eta ordainduko dira. Egunero 1.500 bazkideri dei egingo zaie sarrera jasotzeko eta San Mameseko takiletan jasoko dira.
