Athletic Club
San Mamesen
Athletic-Bartzelona (2-2): Puntu lehiatua zuri-gorrientzat
Erredakzioa
Partidako 90. minutuan jarri du 2-2koa Lionel Messik Athleticen hutsegite bati esker. Bilboko taldeak aurpegia erakutsi du une oro eta garaipenak azken minutuan ihes egin die zuri-gorriei.
Athleticek puntu gazi-gozoa eskuratu du San Mamesen Bartzelonaren aurka. Azken 2-2koa Lionel Messik jarri du partidako 90. minutuan Iturrasperen hitsegite bati esker. Lehenengo zatian Ander Herrerak eta Fabregasek lortu dituzte golak eta Piquek bere atean sartu du 2-1ekoa norgehiagokako 80. minutuan. Amorebietak bigarren txartel horia ikusi du eta Messik 2-2koa jarri du markagailuan.
Lehenengo zatiako hasierako minutuetan Athleticek hartu du norgehiagokaren pisua eta baloia ederki kontrolatu du etxeko taldeak. Zelaia jokatzeko bikain izan da nahiz eta euriak putzuak utzi dituen San Mamesen eta bi taldeek baloia atzetik jokatuta ateratzen saiatu dira.
Partidako 3. minutuan izan du Adrianok aurreneko abagunea, baina Gorka Iraizozek ederki asmatu du brasildarraren saiakera. Bielsaren taldeak nagusitasuna handiagoa erakutsi du eta Ander Herrerak lehenengo jaurtiketa gauzatu du 12. minutuan Valdesen atera. Hala ere Zaragozako jokalari ohiak bigunegi jo du baloia eta Bartzelonako atezaiank erraz hartu du baloia. Geroago, 19. minutuan, Herrerak 1-0ekoa lortu du gol ikusgarri bati esker.
Bartzelonaren erantzuna berehala etorri da eta Cescek 1-1ekoa jarri du erremate eder batekin baloia sare barrura bidalita. Berdinketarekin Kataluniako taldea nagusitu da San Mamesen eta 28. minutuan Iniestak 1-2koa jartzeko aukera argia izan du. Hala ere, Iraizozek gelditu erabakigarria egin dio jokalari espainiarrari. Lehenengo zatiko azken abagunea Muniainek izan du, baina Txantreako jokalariaren saiakera biguna Valdesek gelditu du.
Bigarren zatian Bielsaren mutilak erosoago egon dira berdegunean, baina San Mameseko zelaiak jokatzeko aukera gutxiago eman ditu putzuak handitu egin direlako. Bi taldeek aukera gutxiago izan dituzte, baina Bartzelonak berdinketa apurtzeko bi abagune izan ditu. Aukera argiena Iniestak izan du, baina Iraizoz bikain egon da ate azpian.
Norgehiagokako 80. minutuan heldu da 2-1ekoa Ander Herrerak kornerra atera ostean. Llorentek bigun errematatu du atera eta Piquek sare barrura bidali du baloia nahi gabe. 2-1ekoaren ostean Athleticek asko sufritu du emaitzari eusteko eta Amorebietak bigarren txartel horia ikusi du. Zuri-gorriak hamar jokalarirekin gelditu dira eta 90. minutuan Messik azken 2-2koa jarri du markagailuan Iturrasperen akats larri bati esker. Abadiñoko erdilariak gaizki urrundu du baloia eta aurrelari argentinarrak gola lortu du partidako azken minutuan.
- Fitxa teknikoa:
2 - Athletic Club: Iraizoz; Iraola, Javi Martinez, Amorebieta, Aurtenetxe; Iturraspe, De Marcos, Herrera; Muniain (Ibai, 88. minutuan) Llorente (San Jose, 90. minutuan) eta Susaeta (Iñigo Perez, 85. minutuan).
2 - FC Bartzelona: Valdes; Alves, Mascherano, Pique (Thiago, .80. minutuan), Abidal; Busquets, Xavi (Alexis, 61. minutuan), Iniesta; Messi, Cesc eta Adriano (Villa, 72. minutuan).
Golak: 1-0, 19. minutuan: Herrera. 1-1, 23. minutuan: Cesc. 2-1, 79. minutuan: Piquek bere atean. 2-2, 91. minutuan: Messi.
