Athletic Club
Gaur, 22:00etan
Athleticek bigarren garaipena jarraian lortu nahi du, Huescaren aurka
Erredakzioa
Talde zuri-gorriak gaur jokatuko du Ligako bigarren jardunaldiari dagokion partida San Mamesen. Berizzok ez du deialdiaren berri eman, baina Iñigo Martinez eta Remiro ez ditu deituko.
-
Iker Muniain, Athleticei Legansen aurka garaipena eman zion gola ospatzen. Argazkia: EFE
Athleticek Huesca izango du aurkari gaur San Mamesen, 22:00etan, Ligako bigarren jardunaldiko partidan. Bi taldeek garaipenarekin ekin zioten denboraldiari, eta bigarren partida jarraian irabazi nahi dute.
Talde zuri-gorriak Leganesi irabazi zion (2-1) lehen jardunaldiko neurketa, eta bigarrena jarraian eskuratu nahi dute zale zuri-gorrien aurrean. Eduardo Berizzo entrenatzaileak gaur bertan emango du zerrendaren berri, baina Iñigo Martinez eta Alex Remiro ez ditu deialdian sartuko. "Iñigoren kasuan, uste dut entrenamendu gehiago behar dituela", esan du Berizzok, eta gaineratu du atean ez dela aldaketarik egongo. Ondorioz, Unai Simon izango da atezain titularra bigarren jardunaldian ere.
Bestalde, Huesca lehen jardunaldian Eibarren aurka lortutako garaipenaren bultzadarekin iritsiko da San Mamesera. Leo Franco du entrenatzaile, eta argentinarraren lehen denboraldia da Lehen Mailan entrenatzaile gisa; beraz, entrenatzaile argentinarren arteko lehia ikusi ahalko da aulkietan. Gainera, Huescak lehen aldiz jokatuko du San Mamesen, eta lore-eskaintza egingo dio Pitxitxiren bustoari.
Ustezko hamaikakoak:
Athletic Club: Unai Simon; De Marcos, Yeray, Nolaskoain, Berchiche; Dani Garcia, Raul Garcia, Muniain; Susaeta, Cordoba eta Williams.
Huesca: Werner; Miramon, Pulido, Etxeita, Luisinho; Semedo, Musto, Melero, Gallar; Cucho Hernandez eta Longo.
Epailea: Alberola Fuertes (Gaztela-Mantxako epaile-batzordekoa).
Zelaia: San Mames.
Ordua: 22:00.
