Beste kirolak
Luzera-jauzia
Arotzena, hamaikagarren atletismoko pista estaliko Europako Txapelketan
EITB Media
Iker Arotzena hondarribiarra ezin izan zen luzera-jauziko finalerako sailkatu, eta hamaikagarren postuarekin itxi du bere partaidetza. Tentoglouk zintzilikatu du urrezko domina.
-
Iker Arotzenaren jauzi baten irudia atletismoko pista estaliko Europako Txapelketan. Argazkia: EFE
Iker Arotzena hamaikagarren izan da atletismoko pista estaliko Europako Txapelketan, luzera-jauzian. Istanbulen (Turkia) jokatu da txapelketa martxoaren 2 eta 5a artean.
Hondarribiko (Gipuzkoa) kirolaria ezin izan zen finalerako sailkatu. Arotzenaren jauzi onena 7,57 metrokoa izan zen, eta ez zen nahikoa izan zortzi onenen artean sartzeko. Azkenean, hamaikagarren postuaren itxi du bere partaidetza Europako Txapelketan.
Bestalde, Miltiadis Tentoglou da luzera-jauziko pista estaliko Europako txapelduna, hirugarrenez jarraian. Greziarra 8,30 metroko jauziarekin nagusitu da. Zilarrezko domina Thobias Montler suediarrak zintzilikatu du 8,19 metroko jauzia eginda, eta brontzezko domina lortu du Gabriel Bitan errumaniarrak 8 metroko jauziari esker.
