Alonsoren alde egitea eta Vettelen fitxaketa iragarri ditu Ferrarik

Fernando Alonso pilotu asturiarrak Ferrari taldea utziko du asteburu honetan Abu Dhabiko Sari Nagusian parte hartu ostean, Ferrarik berak Twitter bidez iragarritakoaren arabera.

"Ofiziala: 5 urteren ostean, 1.186 puntu, 44 podium eta 11 garaipen lortuta, @alo_oficial-ek @ScuderiaFerrari utziko du", zabaldu du talde italiarrak Twitterren, "Ferrari Family" eta "Grazie Fernando" etiketak erabilita.

Alonsoren lekua Sebastian Vettel munduko txapelduna lau aldiz izan denak beteko du. Alemaniarrak hiru urterako sinatu du, eta Kimi Raikkonenekin batera arituko da Ferrarin.

Luca di Montezemolo Ferrariko presidente ohiak urrian iragarri zuen Alonsok denboraldiaren amaieran utziko zuela taldea: "Fernandok alde egingo du, bi arrazoirengatik: beste proiektu batean sartu nahi duelako eta, daukan adina edukita, ezin duelako garaipen gehiago lortzeko itxaron", esan zuen orduan Montezemolok.

Antza denez, Alonso McLaren taldera itzuliko da, nahiz eta oraindik komunikatu ofizialik egon ez. Alonsoren bigarren etapa izango litzateke McLarenen, 2007. urtean beraiekin aritu baitzen.

Official: after 5 years, 1186 points, 44 podiums and 11 wins @alo_oficial will leave @ScuderiaFerrari! #FerrariFamily #GrazieFernando

— Scuderia Ferrari (@ScuderiaFerrari) noviembre 20, 2014