Hawking-en ustez humanitateak Lurretik alde egin beharko du bizitzeko

Stephen Hawking fisikari britainiarrak Tenerifen eman duen hitzaldi batean azaldu duenez, Lurraren eskasia dela eta, humanitateak espaziora alde egin beharko du etorkizunean, bizirik jarraitu ahal izateko.

Tenerifeko ‘Starmus’ jaialdiaren hirugarren edizioan, Hawking-ek erlatibitatearen teoriaren ildo nagusiak errepasatu ditu eta mekanika kuantikoaren nondik norakoak azaldu dizkie entzuleei. Halaber, unibertsoa “big bang” izeneko leherketa erraldoi baten ostean sortu zela azpimarratu du, eta horren hedapenak ez duela inolako mugarik gaineratu du. Alde horretatik, iragana ikertzeko egunen batean uhin grabitazionalak erabili ahal izango direla suposatu du.

Era berean, azken 50 urteotan unibertsoaren irudia "erabat" aldatu dela esan du fisikari britainiarrak. Horregatik, inguruan gertatzen dena "ikertzeko eta azalpenak bilatzeko kuriositatea piztu" behar dela ziurtatu du. Zentzu horretan, "garrantzitsuena amorerik ez ematea da".

Zulo beltzen inguruan, berriz, informazioa "ulergaitza" bihurtzen dela azaldu du. Adibide modura, erretako entziklopedia bat erabili du: “informazioa ez da galtzen, baina ulergaitza bihurtzen da”.

Hawking-ek, bere hastapenak nolakoak izan ziren kontatu du, eta gaztaroan unibertsoaren inguruan hitz egitea gustuko zuela esan du. Gainera, hasieran Matematikako ikasketak burutu nahi zituen arren, Natura Zientziak Oxforden ikasteko beka bat eskuratu zuen.

Alboko Esklerosi Amiotrofikoaren (AEA) hastapenetan etsipenean erori zela azaldu du, "gaixotasunak okerrera egiten zuelako egun batetik bestera" eta ez zekielako "tesia bukatzeko denborarik" izango ote zuen. Alabaina, bere ikerketarekin jarraitzeko aukera izan zuen gaixotasunaren garapena geldotzea lortu zuelako.