Google etxearen betaurrekoak jarri dituzte salgai eBay atarian

Google etxea errealitatea areagotzen duten Google Glass betaurrekoak prestatzen ari da, eta oraindik merkatuan ez badaude ere, eBay atarian eros daitezke 16.000 dolarren truke. Betaurrekoak probatzen lehena izan nahi duen erabiltzaile batek jarri ditu salgai.

Erabiltzaileak Google etxeak betaurrekoak probatzeko New York, San Frantzisko eta Los Angeles hirietan egingo dituen ikastaroetan parte hartuko du, eta han jasoko ditu bere betaurrekoak.

Esan bezala, dagoeneko eBay atarian eros daitezke. Hasierako prezioa 1.500 dolarrekoa bazen ere, azken eskaintza 15.900 dolarrekoa izan da.

Pasatu den astean betaurrekoak probatzeko hautagaien bila hasi zen Google etxea. Interesa zutenek otsailaren 27a baino lehen bidali behar zuten eskaria Google+ edota Twitter bidez betaurrekoak zertarako erabiliko zituzten azalduz.

Bidalketa twitter bidez egitekotan, #ifhadglass traola erabili behar zuten interesatuek, gehienez ere 50 hitz erabilita, 5 argazki eta 15 segundo baino gutxiagoko bideo bat.

Aukeratuak izaten diren erabiltzaileek Google Glass betaurrekoen prototipoa erosi beharko dute, 1.122 euro balio ditu (tasak gabe), eta horien gaineko ikastarora joan.