Politika -
Polizia operazioa
Iñaki Imaz ETAko ustezko kidea atxilotu dute Iparraldean
Ondoren, Espainiako agintarien esku utzi dute, euroagindu baten ondorioz.
Erredakzioa
Frantziako Poliziak Iñaki Imaz Munduate ETAko ustezko kidea atxilotu du gaur goizean Hendaian (Iparralde), eta ondoren Espainiako agintarien esku utzi du.
Espainiako Barne Ministerioak baieztatu duenez, euroagindu baten ondorioz atzeman dute.
Imaz abuztuan ere atxilotu zuten, baina aske geratu zen ordu gutxiren buruan, Frantziak espainiaratze eskaera ebatzi arte. Hendaiako komisarian hamabostean behin joateko agindua zuen, baina, iturri judizialen arabera, ez zuen bete. Dena dela, Sud Ouest eta kazeta.info hedabideen arabera, Imaz Komisariara zihoanean atzeman dute.
Espainiako Poliziak 2007. urtean 'Urederra' taldeari laguntzea egotzi dio, komando horretako kide 'liberatuak' ustez etxean hartzeagatik. ETAren inguruko propaganda egitea ere egotzi diote, 'Zutabe' aldizkariaren bitartez.
Terrorismoaren aurkako borrokaren esanetan, Imazek ihes egin zuen Poliziak 'Urederra' taldea desegin eta gero, eta, ondorioz, ETAk egotzi egin zuen erakunde terroristatik.
