Politika -
Madril
Kongresua 1.600 poliziak blindatuta geratu da Sanchezen inbestidurarako
Gainera, goizean goizetik segurtasun dispositibo handia zabaldu dute Ferrazen eta inguruetan, PSOEren egoitzaren aurkako erasoak geldiarazteko. Espainiako banderak zeramatzaten dozenaka lagunek txistu egin diete Sanchezen bazkideei Kongresuaren inguruetan.
Agentziak | Eitb media
1.600 agentek baino gehiagok osatzen dute Pedro Sanchezen inbestidura saiorako segurtasun dispositiboa Diputatuen Kongresuan. Inbestidura saioa goizean hasi eta ostegunera arte luzatuko da, PSOEko buruak gobernu programa berria azalduko du eta konfiantza eskatuko dio Ganberari, Moncloan agintaldia berresteko.
Kongresuaren inguruko segurtasun-dispositiboa "herritarren segurtasunerako 1.300-1.400 agentek " osatzen dute nagusiki. Barne Ministerioak, hala ere, 1.600 agentera igo du kopurua, besteak beste, informazioan, zorupean edo txakur-gidetan adituak direnak ere sartzen dituelako horretan.
Dispositiboa atzo, asteartea, itxi zuten, osoko bilkura hasi baino 24 ordu lehenago, eta Francina Armengol Behe Ganberako presidenteak inbestiduraren data astelehenean iragarri ostean, PSOEk amnistia legearen proposamena erregistratu zuen egun berean.
Inbestiduraren aurkako protesta Kongresuan
Amnistiaren aurkako elkarretaratzeek Madrilen jarraitzen dute eta asteazken honetan Diputatuen Kongresuan izan dira, Pedro Sanchezen inbestidura saioa dela eta.
Dozenaka pertsona, ia berrogeita hamar, iritsi dira Kongresuaren ateetara Espainiako banderak eta Pedro Sanchezen aurkako kartelak jantzita, eta txistu egin diete Moncloarako hautagaiaren inbestidura babestuko duten PSOEko diputatu bazkide parlamentarioei.
Txistuekin, ohiuekin eta pankartekin egin diete harrera Kongresura iritsi diren Sumarreko diputatuei. Jaume Asens Sumarreko negoziatzailea eta Jessica Albiach Kataluniako Parlamentuko En Comu Podem taldeko presidentea buru dituen En Comu Podemeko ordezkaritzak protesta oihuak jaso ditu.
