EH Bilduk eta EAJk azalpenak eskatu dituzte, Arturo Espejo Guardia Zibileko buruzagitzara igo delako

Aitor Esteban bozeramaile jeltzaleak Espainiako Gobernuri egiteko hainbat galdera erregistratu ditu Diputatuen Kongresuan, "Arturo Espejo teniente jeneral eta Guardia Zibileko buruzagiaren maila-igoerari buruz". Era berean, EH Bilduk Fernando Grande-Marlaska Barne ministroaren agerraldia eskatu du Kongresuan, maila-igoeraren arrazoiak azal ditzan.

Egiari Zor fundazioak ohar baten bidez salatu duenez, "igoera horrek agerian uzten du, beste behin ere, gehiegi jada, Estatuko indarkeriaren biktimei egiten zaien etengabeko iraina eta birbiktimizazioa".

Mikel Zabalza 1985eko azaroaren 26an atxilotu zuten Donostian, eta beste bost pertsonarekin batera, operazio batean. Bostak kargurik gabe aske geratu ziren, eta torturak salatu zituzten. Zabalzaren gorpua 19 egun geroago aurkitu zuten, Bidasoa ibaian, eskuburdinak jarrita.

Ohar baten bidez jakinarazi duenez, EAJk jakin nahi du Espainiako Exekutiboaren iritziz "errugabe baten heriotzarekin amaitu zen tortura kasu batean inplikatutako pertsona batek igoerak eta kondekorazioak merezi dituen" eta "uste duen Mikel Zabalzaren mendeko izan zirenek eta faltsua frogatu den gertatutakoaren bertsio ofiziala eman zutenek pertsonifikatu egiten ote dituzten Guardia Zibilak defendatzen dituen balioak".

"Intxaurrondoko kuartelean Mikel Zabalza estu hartu zuenetako bat, Guardia Zibilak berak kontatutakoaren arabera, garai hartan tenientea zen Arturo Espejo izan zen", salatu dute jeltzaleek.

Bestalde, EH Bilduk, ekimen baten bidez, Espainiako Gobernuari galdetu dio ea egokia den "kasurik zikinetako baten arduradun nagusia Guardia Zibilaren buruzagitzan egotea", Zabalzaren heriotza, esaterako.

Jon Iñarritu EH Bilduko diputatuak gogorarazi du iaz igo zutela Espejo, eta Eusko Jaurlaritzak Mikel Zabalza poliziaren indarkeriaren biktima gisa aitortzeko asmoa zuela jakin ostean erabaki hori hartu zuen argitzeko eskatu dio Estatuko Gobernuari.

"Mikel Zabalzaren desagerpenari buruzko bertsio ofiziala (Guardia Zibilarengandik ihes egin ondoren) faltsua da, argi eta garbi, Eusko Jaurlaritzaren txostenak agerian uzten duen bezala", adierazi du koalizioak, eta Guardia Zibileko kapitain Pedro Gomez Nietoren eta CESIDeko orduko zuzendari Juan Alberto Peroteren elkarrizketak ere gogora ekarri ditu, torturak jasan ondoren Intxaurrondon hil zela dioten audio batzuen bidez.