EAJk, EH Bilduk, PSE-EEk eta EP-IUk Jaurlaritzari eskatuko diote gutxieneko soldataren igoera bultzatzeko

EAJk, EH Bilduk, PSE-EEk eta Elkarrekin Podemos-IUk adostu dute Eusko Jaurlaritzari eskatzea Espainiako Estatuan indarrean dagoena baino Lanbide arteko Gutxieneko Soldata handiagoa (LGS) bultza dezala.

EITB Mediak eskuragarri izan duen lau puntuko akordioaren arabera, zehazki, lau alderdiek Euskal Autonomia Erkidegoko Exekutiboari eskatzen diote bultza dezala, "betiere gizarte-eragileen autonomia errespetatuz", lanbide arteko akordioak Euskadiko errealitate sozioekonomikoarekin bat datorren negoziazio kolektiboko gutxieneko soldata jasotzea.

Horrela, "negoziazio kolektiboa errespetatuz", sindikatuek eta patronalak lanbide arteko akordioaren esparruan Euskadin negoziazio kolektiboko gutxieneko soldata bat "adostea komeni" dela adierazi dute, Euskadiko errealitate sozioekonomikoan oinarrituta.

Horregatik, Eusko Jaurlaritzari eskatzen diote "jarrera proaktiboa" har dezala konpromiso horretan aurrera egiteko beharrezkoak diren neurriak hartzeko, eta, horrekin batera, "enpleguko eta elkarrizketa sozialeko esparru guztietan Euskadiko langileen soldatak eta lan-baldintzak hobetzea defendatu eta sustatzeko".

Akordioak, halaber, "Lanbide arteko Gutxieneko Soldataren igoeraren garrantzia" balioesten eta aitortzen du, Euskadiko 50.000 langile baino gehiagori zuzenean mesede egiten baitio.

EH Bilduk mozio bat aurkeztu zuen iragan astelehenean Eusko Legebiltzarrean, Araban, Bizkaian eta Gipuzkoan 1.400 euroko lanbide arteko gutxieneko soldata ezartzea eskatzeko. Hala ere, lau indar politikoen arteko akordioak ez du zenbatekorik zehazten.

Arkaitz Rodriguez legebiltzarkidearen iritziz, pozgarria da Espainiako Gobernuak berriki gutxieneko soldata 1.080 eurora igo izana, baina ez da nahikoa Araba, Bizkaia eta Gipuzkoarako. EH Bilduko legebiltzarkideak uste du eskumenik gabe ere ezarri daitekeela gutxieneko soldata, baldin eta borondate politikorik badago.