Politika -
Kartzela-politika
Ministerioak aringarriak ukatu dizkie damutu ez diren ETAko presoei
Fernandez Diazek azpimarratu egin du presoen damua eta barkamena "benetakoa" izan behar dela; bestela, "ezin izango dituzte legeak aurreikusten dituen aringarriez gozatu".
Erredakzioa
Jorge Fernandez Diaz Barne ministroak konfirmatu egin du Espetxeetako Zuzendaritza Nagusiak aringarriak ukatu dizkiela ETAko zenbait presori egindakoaz damutu ez izanagatik. Aringarriak ukatzeko erabakia "legeari iruzur" egiteko asmoari eman beharreko erantzuna dela esan du.
PPk Sevillan egindako kongresuaren amaieran kazetariei egindako adierazpenetan, Gobernuaren politika "banakako damuan eta banakako barkamen eskakizunean" oinarritzen dela esan du Fernandez ministroak.
Gobernuari "engainurik ez"
Hala ere, "legeari iruzur egiten" saiatzen direnean, Gobernuaren erantzun argia jasoko dutela esan du Fernandez Diazek, aipatutako kasuetan emandako erantzun berbera, Exekutiboak ez baitu iruzurrik onartuko, eta, aldi berean, Espainiako gizarteari ere iruzur egitea.
Hori dela eta, Barne ministroak berriro azpimarratu du presoen damua eta barkamena "benetakoa" izan behar dela; bestela, "ezin izango dituzte legeak aurreikusten dituen aringarriez gozatu".
