Jaurlaritzak boto elektronikoa bultzatzeko lege-aldaketak iragarri ditu

Josu Erkoreka Segurtasun sailburu eta lehendakariordeak iragarri duenez, "beharrezkoak diren" lege-aldaketak bultzatuko ditu, bai EAEn baita Estatuan ere, hauteskundeetan teknologia berriak erabili ahal izateko, "bai posta bidezko botorako, bai boto elektronikorako".

Erkorekak agerraldia egin du asteazken honetan, berak eskatuta, Eusko Legebiltzarreko Erakunde, Gobernantza Publiko eta Segurtasun Batzordean, bere sailaren jarduera-ildoak aurkezteko.

Hitzaldian, hauteskunde arloan indarrean dagoen araudi esparrua "sakon" aztertzeko konpromisoa hartu du, "beharrezkoak diren lege aldaketak proposatzeko eta bultzatzeko, bai erkidegoan, bai Estatuan, hauteskundeetan teknologia berriak erabili ahal izateko, bai posta bidezko botorako, bai boto elektronikorako".

Posta bidezko botoari dagokionez, administrazio publikoen sistema informatikoak integratzearen alde lan egingo duela iragarri du, "posta bidezko botoa eman nahi duenak eskaera online egin dezan identifikazio eta sinadura digitaleko sistema seguru batekin".

Halaber, Internet bidezko botoa "Europa osoan zabaltzen ari den aukera" dela azaldu du. "Gure betebeharra formula hau aztertzea eta hauteskunde aukera hau irekitzeko proba pilotuak egitea da", gaineratu du.

Jakitera eman duenez, boto digitalaren lehen esperientzia CERA botoarekin eman daiteke; izan ere, azken hauteskundeetan, erroldaren "ia % 80k" ezin izan zuen botoa eman. Hala ere, hori posible izan dadin, Estatuarekin  Izenpe, "Autentifikazio, Identifikazio eta Sinadura Digitalerako Euskal Sistema" onartzea premiazkoa dela azpimarratu du.