Politika -
Eusko Legebiltzarra
Autogobernu Lantaldeko adituen agerraldiak ateak itxita egiten jarraituko dute
Hala erabaki du gehiengoak, EH Bilduren eta PPren kontrako botoekin.
Agentziak | Erredakzioa
Orain arte bezala, Estatutu berriaren inguruko proposamenak egin dituzten adituen agerraldiak ateak itxita egingo dituzte Eusko Legebiltzarreko Autogobernu Lantaldean, taldeek erabakita.
Bozketa egin dute gaur goizean, EH Bilduk eta PPk saio irekiak egitea eskatu ostean. EAJk, PSE-EEk eta Elkarrekin Podemosek ateak itxita egitearen alde bozkatu dute, EH Bilduk eta PPk, berriz, kontra.
Iñigo Urrutia (EH Bildu) eta Arantxa Elizondo (Elkarrekin Podemos) adituen agerraldiak daude gaurko aurreikusita. Urrutiaren hitzaldia hasi baino lehen bozkatu dute taldeek.
Urrutiaren eta Elizondoren agerraldien ostetik, bihar, Alberto Lopez Basagurenek (PSE-EE) emango ditu azalpenak, eta urtarrilaren 31n, Mikel Legardak (EAJ). Egun horretarako zegoen aurreikusita Juan Ignacio del Burgo PPko adituaren agerraldia, baina 'popularrek' iragarrita zuten ez dela Legebiltzarrera joango saioak ateak itxita badira.
