Rubalcabaren dimisioa eskatu du PPk, 'ETArekin kolaborazioa" egotzita

PPren ustez, Alfredo Perez Rubalcaba Barne ministroak gaur goizean bertan jarri behar du kargua Gobernuko presidentearen esku, 2006an ETAri Faisan tabernan egitekoak ziren sarekadaren berri eman ziotenean "ETArekiko kolaborazio politikoan" nahasita egon litekeela zabaldu eta gero. 2006ko ekainean ETAk eta Espainiako Gobernuak egin zuten bileraren akta argitaratu du gaur El Mundo egunkariak. Dokumentuaren arabera, Espainiako Gobernua Faisan operazioa "geldiarazten saiatu" zen, eta hala jakinarazi zion ETAri.

"Gaur argitaratutako informazioaren arabera, baliteke Rubalcaba ETArekin kolaboratu izana, eta, horrez gain, hori egin ahal izateko ministro izendatu zutela. Horregatik, bere kargua Zapatero presidentearen esku jarri beharko luke", gaineratu du Gonzalez Pons.

Bestalde, Federico Trillo PPko Justizia arduradunak esan du, Gobernuak "lehenbailehen" El Mundok argitaratutakoa argitu beharko duela. "Argitaratutako artikuluak egia esaten duen argitu behar du Gobernuak orain; Gobernuaren izenean hitz egiten zuen bitartekaria nor den eta gauza horiek esan bazituen argitu behar du Gobernuak". Gonzalez Pons-en ustez, "Barne ministro izaten jarraitzen duen minutu bakoitzean Jose Luis Rodriguez Zapatero presidentea Faisan auziarekin erlazionatu egiten du". Zapaterori exijitu dio "berehala" ETA eta Gobernuaren arteko gutun pribatuak aireratzeko. "Gutun horiek existitzen badira, publikoki erakutsi behar dituzte. Espainiak Gobernu gardenia merezi du, eta ez ETArekin elkarlanean dabilen Barne ministro bat".