Eguigurenek 'ausardia falta' leporatu dio Zapaterori Sorturen auzian

Jesus Eguiguren PSE-EEren presidenteak uste du Jose Luis Rodriguez Zapatero Espainiako gobernuburuak eskuinari enbarazu ez egiteko bidea hautatu duela terrorismoaren kontrako borrokan "ausardia faltagatik".

El Pais egunkarian idatzi duen artikulu batean Eguigurenek azaldu duenez, "ezkutatzeko zarata handia egiten badute ere, Euskal Herria ezagutzen duten politikari serioek ezin dute ukatu Batasunak agur esan diela armei eta horrek, berandu baino lehen, ETAren amaiera ekarriko duela".

"Espainiak hamarkada luzeetan Euskal Herriaren zauri odoltsua pairatu ostean, orain bakerako pausoak ikusten dira, baina Espainiako politikak ardurarekin eta zuhurtziarekin jokatu beharrean, imajina genezakeen politika okerrena egiten du, harrokeriaz gainera", idatzi du Eguigurenek artikuluan.

Buruzagi sozialistak salatu du eskuindarrek "egoera berriak porrot egitea" nahi dutela, eta hori ez dela "elektoralismoagatik", "patriotismo faltagatik baizik".

Eguigurenen arabera, "eskuindarrek eragindako egoeraren aurrean makurtzeak adostasun itxura eman dezake, baina egungo adostasuna faltsua da".

Hori horrela, "adostasuna txarra" dela uste du, izan ere, "PPk dioena onartzen bada, ondo, baina gogoko ez duena egiten bada, Gobernuaren kontrako erasoak eta jazarpena erabatekoak izango dira".

PSE-EEren presidenteak salatu du Gobernuak "eskuindarrei enbarazu ez egiteko" bidea aukeratu duela terrorismoaren kontrako borrokan, eta hori "ausardia faltagatik" omen da.

"Pasibotasun horrek ez dizkio boto gehiago emango, kontrako jarrerak ere ez lizkioke emango agian, baina patriotismoagatik, eta PPrekin liskar gehiago izatea ekartzen badu ere, Euskadin bakea lortzeko aukerak sortzen duen giro ezkorrari aurre egin beharko lioke", gaineratu du.

"Alderdien Legearen defendatzaile sutsuenetako bat naizen heinean, arduragabekeria handia ikusten dut" iritzi publikoaren eta auzitegien aurrean ematen den "alarmismo eta presio" giroa Sorturen balizko legalizazioa dela eta, izan ere, "argudio demagogikoak eta faltsuak" erabiltzen ari omen dira.

"Hauteskundeak gauza bat dira. Batzuetan irabazi egiten da eta besteetan galdu. Baina bizitzak sakratuak dira eta lehentasuna izan behar dute. Arduragabe batzuk izango gara aukera galtzen badugu. Ez gaitezen inozoak izan, gaur boikota egiten dutenak bihar bakea lortu dutela esango dute eta", azpimarratu du Eguigurenek artikulua amaitzeko.