Politika -
EAE-KO AURREKONTUAK 2018
EAEko Aurrekontuen aurkako helegiteak aurrera ez egitea espero du Urkulluk
Lehendakariaren iritziz, Espainiako Gobernuak Euskal Autonomia Erkidegoko 2018ko Aurrekontuei helegitea aurkezteko asmoa 'zentzurik gabeko mehatxua' da.
AGENTZIAK | ERREDAKZIOA
Urkullu lehendakaria eta Josu Erkoreka Eusko Jaurlaritzako bozeramailea kritiko mintzatu dira Espainiako Gobernuak 2018ko Euskal Autonomia Erkidegoko (EAE) Aurrekontuei helegitea aurkezteko balizko asmoaren aurrean. Alderdi Popularreko hainbat ordezkariren esanetan, ordea, Rajoyren Gobernuak ez dauka helegitea aurkezteko asmorik.
Lehendakariaren iritziz, "ez dauka zentzurik helegitearen mehatxua egitea". Hori dela eta, helegiteak aurrera ez egitea eta auzia "tokiz kanpo egindako ohartarazpen hutsean" gelditzea espero du.
Donostian kazetarien aurrean egindako adierazpenetan Urkulluk zehaztu duenez, EAEko Administrazio Orokorreko langile publikoentzat Aurrekontuetan jasota dagoen % 1,5eko soldata igoera bera planteatzen du Madrilgo Gobernuak 2018ko Aurrekontuetan. Beraz, jarrera zentzugabe hori aldatzeko eskatu dio lehendakariak Espainiako Gobernuari.
Bestalde, Urkulluk gogoan izan du legealdi hasieran Rajoyk epaitegietan helegiteak ez jartzeko adierazitako konpromisoa, eta "behingoz" hitz emandakoa betetzeko eskatu dio.
Erkorekak oso larritzat jo du PPren Gobernuaren helegitea
Josu Erkoreka Eusko Jaurlaritzako bozeramaileak ere Espainiako Gobernuak Euskadiko aurrekontuei helegitea aurkezteko asmoa hizpide izan du, eta "mehatxu oso larritzat" jo du. Aldi berean bere "harridura" agertu du Alderdi Popularrak Eusko Legebiltzarrean EAEko Aurrekontuak babestu zituelako eta Rajoyren Gobernuak "antzerako akordio bat" lortu duelako Madrilen.
Bizkaia Irratiari eskainitako elkarrizketan adierazi duenez, "harridura" eragiten die "martxan jarritako tramiteari garrantzia kenduz" Rajoyren Gobernuko hainbat ordezkarik egindako adierazpenek.
Erkorekaren iritziz, "mehatxu oso larri eta garrantzitsua da".
Gauzak horrela, Aurrekontu Legearekin arazorik ez dagoela eta helegitea aurkezteko mehatxurik ez dagoela jakinarazteko eskatu dio Erkorekak "aurreko astean mehatxu egin eta errekerimendua bidali zuen zuzendari nagusiari". "Zuzenketarik ez dagoen bitartean, mehatxua, arriskua hor dago", gaineratu du.
De Andresek "aitzakia gehigarriak" bilatzea egotzi dio EAJri
Javier de Andres Espainiako Gobernuak Euskal Autonomia Erkidegoan duen bozeramaileak azpimarratu duenez, Rajoyren Gobernuak ez dauka EAEko Aurrekontuen aurkako helegitea aurkezteko asmorik, eta Espainiako Aurrekontuak ez babesteko "aitzakia" bila aritzea egotzi dio EAJri.
