Inocencio Alonso saritzeko asmoa jakinaraziko dio Beltran de Herediak Ertzaintzari

Estefania Beltran de Heredia Eusko Jaurlaritzako Segurtasun sailburua Ertzaintzako sindikatuekin bilduko da datorren asteartean, eta jakinaraziko die Eusko Jaurlaritzak Babes Zibileko Merezimenduaren domina gorria eman nahi diola Inocencio Alonso Bilboko istiluetan hildako ertzainari. Athletic eta Spartak futbol taldeko zaleen arteko liskarrak zirela eta, Ertzaintzak abiatutako segurtasun operatiboan lanean zegoela hil zen Alonso, bihotzekoak jota.

Segurtasun Saileko iturriek diotenez, bi izango dira Ertzaintzaren sindikatuekin eztabaidatuko dituzten gaiak: batetik, hildako ertzainari aitorpen hori egitea eta, bestetik, Ertzaintzaren modernizazioaren inguruko hausnarketa egitea. Zentzu horretan, Beltran de Herediak plan bat jarri nahi du martxan Ertzaintzako elite-taldea modernizatzeko helburuz.