Politika -
Polizia Operazioa
Caamaño, atxiloketen harian: 'Gobernuaren jarrera ez da aldatu'
Ezker abertzalea 2011ko hauteskundeetara ez aurkezteko, Hauteskunde Legea aldatzeko batzordea eratzen ari direla esan du Justizia ministroak.
Erredakzioa
"Askok egunero kontrakoa esan arren", Ekineko bederatzi kide atxilotu izanak erakusten duenez, "Espainiako Gobernuaren jarrera ez da aldatu", esan du gaur Francisco Caamaño Justizia ministroak. Horren harian, Estatuak indarkeriaren aurka lanean jarraitzen duela azpimarratu du.
Caamañoren ustez, ETAren iragarpenaren karietara zabaldutako "zenbait berri oinarri gabekoak" direla agerian utzi du polizia operazioak. Are gehiago, Estatuko segurtasun indarrek, Fiskaltzak eta epaileek euren betebeharra zorroztasun berarekin betetzen jarraitzen dutela adierazi du.
2011ko hauteskundeak
Ezker abertzalea 2011ko hauteskundeetara ez aurkezteko, Hauteskunde Legea aldatzeko batzordea eratzen ari direla ere iragarri du Justizia ministroak.
Aldaketok Konstituzioaren eta Auzitegi Konstituzionalaren jurisprudentzia errespetatuz egingo dituztela esan du Caamañok, eta ezker abertzalea erakundeetan ez izateko sistema eraginkorra izango dela aurreratu du.