'Txapote'ri zortzi urteko kartzela-zigorra ezarri diote

Javier Garcia Gaztelu Txapote ETAko zuzendari ohiari zortzi urteko espetxe-zigorra ezarri dio Auzitegi Nazionalak, ETAko kideei lehergaiz kargatutako bi furgoneta emateagatik. Furgoneta horiekin 1999ko su-etena apurtu nahi izan zuen ETAk, epaitegiaren esanetan.

Demostraturik geratu denez, Frantziatik Madrilera lehergai kantitate garrantzitsu bat eraman nahi izan zuen ETAk, baina zertarako erabili behar zuten eta non ez dute zehaztu oraindik. Horretarako, Igor Martinez de Osaba Arregi, Alicia Saez de la Cuesta eta Jose Maria Novoa Arroniz ''Basurde'' taldeko kideak 1999ko abenduaren 19an Daxera (Frantzia) joan ziren Txapote-rekin biltzeko.

Txapote-k bi furgoneta eman zizkien, batean 950 kilo kloratita eta bestean beste 688,7 kilo, eta horrez gain gomazko 50 kilo dinamita eta 300 gramo amonita bakoitzean. Bi kargek pizte sistema zuten eta detonagailuak konektatzea baino ez zuten behar aktibatzeko.

Auzipetuak deklaratzeari uko egin dio epaiketan zehar eta bere kontra froga "erabakigarriak" hiru direla uste du Auzitegiak. Horrela, Auzitegi Nazionala ''Basurde'' taldeko kideetako baten deklarazioan oinarritu da, izan ere, ETAri atxiloketa azaltzen dionean Gaztelu furgoneten aferarekin erlazionatzen du.

Era berean, taldeko kideen deklarazioak aintzat hartu dituzte. Nahiz eta epaiketan zehar Txapote-ren kontrako ezer ez gogoratzea adierazi, gertakari guztiak onartu zituzten euren aurkako bistatan. Gainera, Gaztelu ETAko buruzagietako bat izan zela frogatuta geratu dela uste du Auzitegiak.