'Zubiak eraikitzeko' prest dagoela jakinarazi dio EH Bilduk EAJri

Pello Urizar EA alderdiko idazkari nagusia eta EH Bilduko legebiltzarkidea denak EAJri jakinarazi dio gaur prest dagoela "zubiak eraiki eta estatus berri bat adosteko", baina, azpimarratu duenez, "estatus berri bat ez da Estatutu berri bat".

Gazte Abertzaleak EAko gazte erakundeko zuzendaritza eta idazkari nagusi berria aurkezteko Bilbon eman den prentsaurrekoan izan da Urizar, eta legegintzaldiko lehen bi urteetan autogobernuari buruzko testu bat adosteko EAJren proposamena izan du hizpide.

EAko buruak adierazi duenez, EH Bilduk "adosteko borondatea du, baldin eta estatus berri baterantz aurrera egiteko jarrera badago", baina jeltzaileei ohartarazi die "estatus berri bat Estatutu berri bat baino gehiago" dela.

"Bi urteren buruan egin daiteke, guk ere horrela uste dugu, eta adosteko daukagun asmoa mahai gainean dago, hauteskunde-kanpaina baino arinagotik, kanpaina eta gero eta honako etapa honetan ere", azaldu du.