EH Bilduk Blancoren omenaldian hartu du parte, lehen aldiz

19 urte bete dira ETAk Miguel Angel Blanco Ermuko PPko zinegotzia bahitu eta hil zuela. Bere herrian, urtero bezala, omenaldia egin dio Udalak, eta aurten, lehen aldiz, EH Bilduk hartu du parte.

Paul Yarza eta Mireia Arginzoniz ezker abertzaleko koalizioak Ermuko Udalean dituen bi zinegotziak eta Peio Urizar EAko idazkari nagusia izan dira ekitaldian.

Gainera, aurten, lehen aldiz baita ere, ETAk hildako beste ermuar bat gogoratu du Udalak: Sotero Mazos Figueras ile-apaintzailea tiroz hil zuen talde armatuak, Eibarren, 1980an.

Carlos Totorica alkate sozialistarekin batera, alderdi guztietako ordezkariek eta dozenaka herritarrek hartu dute parte omenaldian. Eusko Jaurlaritzaren izenean, Jonan Fernandez Bake eta Bizikidetzarako idazkaria izan da.

Totoricak esan duenez, Blancoren hilketaren ondoren abian jarritako herritarren mugimenduak ETAren porrota ekarri zuen. Talde armatuak erabat desagertu behar duela eta eragindako minagatik barkamena eskatu behar duela nabarmendu du.