Puigdemontek aldebakarreko independentzia adierazpen bat baztertu du

Aldebakarreko independentzia adierazpen bat egitea baztertu du Carles Puigdemont Generalitateko presidenteak: “Ez dago aurreikusita. Hauteskundeetan hartutako konpromisoa ez zen aldebakarreko independentzia adierazpena izan”.

TV3 telebistan egindako elkarrizketan, xedea konstituzio bat idazten hastea dela azaldu du Generalitateko presidenteak eta, ondoren erreferendum bat eginez, Kataluniako Estatu berriari babesa emango dion “gehiengoa” bilatzea.

Bestalde, nahiz eta erregea eta Konstituzioa ez aipatu, kargua zin egiteko erabili zuen formula “guztiz legezkoa” dela ziurtatu du Puigdemontek. Mariano Rajoy jarduneko presidenteak zoriontzeko deitu ez izana deitoratu du Kataluniako buruzagiak.

“Gobernuko presidentearen oinarrizko adeitasun arau bat izan beharko litzateke, nahiz eta jardunean egon. Katalunian Estatuko ordezkaria naizela uste baldin badu, deitzea ez litzateke soberan egongo”, gogoeta egin du. Era berean, erregeak Carme Forcadell Parlamentuko presidentea hartu ez izana kritikatu du Kataluniako agintariak.

Nahiz eta independentzia bezalako proiektu politikoa defendatu, Estatuaren interesen guztiz kontrakoa, zubiak apurtzeko batere borondaterik ez duela ziurtatu du Puigdemontek, baina helburua Kataluniako Estatua lortzea dela ohartarazi du: “Ez gara kikilduko”.