Politika -
AUZITEGI NAZIONALA
Epaiaren zain geratu da Iruñerriko Segiko auzipetuen kontrako epaiketa
Defentsak absoluzioa eskatu du 10 auzipetuentzat, eta fiskalak 10 urtetik 6ra jaitsi du zigor eskaera
AGENTZIAK | ERREDAKZIOA
Auzitegi Nazionalean epaiaren zain geratu da Iruñerriko 10 gazteren kontra, Segiko kide izatea leporatuta, egindako epaiketa.
Auzipetuetako batek, Ibai Azkonak, "epaiketa politikoa" izan dela esan du. Gainera, auzipetuek egindako tortura salaketak ez dituzte aintzat hartu.
Defentsak absoluzioa eskatu du auzipetu guztientzat, eta, prozesu konplexua ez bada ere, atxilotu zituztenetik (2008) behar baino gehiago luzatu dela esan du.
10 urtetik 6ra
Pedro Rubira fiskalak 10 urtetik 6ra jaitsi zuen kartzela zigor eskaria. Segik Iruñean zituen bi taldetako kide izatea eta kale indarkeria ekintzetan parte hartzea leporatzen diete.
Fiskalaren arabera, "Iturrama eta Milagrosa auzoetan Segik zituen bi taldeetako kideak ziren hamar gazteak eta 2006 eta 2008 artean kale indarkeria ekintzetan hartu zuten parte".
Joan den astelehenean hasi zen epaiketa Auzitegi Nazionalean. Hasiera batean, hamarna urteko kartzela zigorra eskatu zuen fiskalak auzipetuentzat, talde terroristako kide izatea leporatuta. Horietako hiru espetxean daude, behin-behinean.
