Politika -
Barne krisia
Donostiako zinegotzi batek PP utzi du Semperrek 'betoa' jarri diolako
"Politika edozein modutan egiteko betoa jarri dit. Ez banaute nahi, zertarako jarraitu, etsipenez noa", adierazi du Vicente Garciak.
Erredakzioa
Vicente Garcia zinegotzi donostiarrak PP alderdia utzi du Borja Semper buru duen Gipuzkoako zuzendaritzak Miren Albistur Donostiako alkategai popularraren zerrendan sartzeko "betoa" jarri diola iritzita.
Garciak Efe albiste-agentziari azaldu dionez, ez da "haserrealdi" hutsa PPren zerrendan sartu ez dutelako; izan ere, ez zuen sartzeko interesik, eta Albisturren "berritze proiektuan parte hartu" besterik ez zuen nahi, "edozein lekutan".
"Politika edozein modutan egiteko betoa jarri didate. Ez banaute nahi, zertarako jarraitu, etsipenez noa", adierazi du zinegotzi donostiarrak. 2011n aurkeztu zen lehenengo aldiz hauteskundeetan, independente gisa, eta gero PPko afiliatu egin zen.
Garciak aitortu du "desadostasun handiak" izan dituela Semper buru duen Gipuzkoako PPren zuzendaritzarekin. Semper Albisturren hautagaitzaren kontra agertu zen, eta horrek barne krisia eragin zuen Gipuzkoako eta EAEko zuzendaritzen artean.
