Politika -
Udal eta foru hauteskundeak
Hauteskundeetara elkarrekin aurkeztea proposatu dio Ciutadansek UPyDri
Hautagaiak hauteskunde primarioen bidez aukeratuko dituzten "bermea" izatea nahi du Albert Riverak, eta baldintza hori ipiniko dio UPyDri zerrenda bateratua adosteko.
Erredakzioa
Albert Riverak Ciutadanseko (C’s) presidenteak iragarri duenez, buru duen alderdiak aho batez adostu du UPyDri 2015eko Udal eta Foru Hauteskundeetara elkarrekin, "zerrenda bateratu" batean, aurkezteko proposamena egitea.
Zerrenda bakarrean eta proiektu beraren baitan aurkezteko negoziatzen ari direla nabarmendu du Albert Riverak, "komunean ditugunak banatzen gaituztenak baino gehiago direlako".
Riveraren hitzetan, baldintza bakarra ipiniko du Ciutadansek zerrenda bateratua adosteko: hautagaiak hauteskunde primarioen bidez aukeratuko dituzten "bermea" izatea.
Ciutadanseko buruzagiak alderdiak Bartzelonan duen egoitzan egin du iragarpena, '1980' Iñaki Artetaren dokumentala aurkeztu ondoren.
