Blesa ikertu artean bera ez epaitzeko eskatu du Silvak

Gaur hasi da Elpidio Jose Silva epaile ohiaren aurkako epaiketa Madrilgo Justizia Auzitegi Gorenean, 'Blesa' auzian prebarikatzeagatik. Miguel Blesa Caja Madrideko presidente ohiaren gestioa ikertu bitartean, Silvak epaitua ez izateko eskatu du.

Halaxe defendatu du Gonzalo Boye abokatuak aurre-galdeketa fasean egindako zortzi galderetan. Epaiketa bertan behera uzteko edo, bestela, haren bezeroaren eskubideak urratzen dituela uste duen frogak egiteari uzteko eskatu du, esaterako, Carlos Aguilar Blesaren abokatuak lekuko bezala deklaratzea edo Gonzalo Diaz-Ferran CEOEko presidente ohia akusazio gisa aurkeztea.

Arturo Beltran epaimahaiko presidenteak iragarri du galderen eta alde guztien parte hartzearen ostean, Auzitegia erabaki bat hartzera erretiratuko dela eta asteartean adieraziko duela epaiketa bertan behera utziko duen edo ez.

Madrilgo Justizia Auzitegi Goreneko Arlo Zibil eta Penaleko Epaitegiak Silvaren aurkako epaiketa errepikatu du gaur, aurrekoa Maria Tardon epailearen uko egiteagatik bertan behera gelditu ostean. Silvak Tardon epaimahaitik kentzeko eskatu zuen, Caja Madrideko Biltzar Nagusiko kide baitzen.

Madrilgo bankuaren aurkako oihuen artean iritsi da Silva epaitegira, eta abokatuen artean eseri da, epaile dela argudiatuz, akusatuen eserlekua baztertzeko.