Etxeratek Iruñea zeharkatu du Sevillan gose greban dauden presoen alde

Ehunka pertsonak parte hartu dute Sevilla II kartzelan gose greban dauden ETAko presoen alde Iruñean egindako manifestazio batean, eta "kartzeletan giza eskubideen esparruan ematen ari den atzerako pausoa" arbuiatzeko.

Martxa Etxerat presoen eskubideak defendatzeko dituen elkarteak deituta zegoen, eta 17:00etan hasi da Nafarroako hiriburuko autobus geltoki zaharrean, Euskal presoen eskubideak errespetatu! lelopean, eta Sarasate pasealekuan bukatu da, Foru Parlamentuaren aitzinean.

Protesta honen bidez, Etxeratek "egungo kartzela politika", "Estatuaren immobilismoa eta kartzeletan giza eskubideen esparruan ematen ari den atzerako pausoa" arbuiatu nahi izan ditu.

Etxeraten iritzian, Sevilla II kartzelako ETAko presoen kasua egoera honen "muturreko adierazgarria da". Bide batez, "euskal gizartea giza eskubideen alde manifestatzeko" deia egin du, "Gobernuak ezin dituelako giza eskubideak kendu eta eman, saritu edo zigortu nahi duenean". "Bakerako bidea zabalik geratuko da giza eskubideak errespetatzen direnean".

Amaia Izko Sortuko bozeramaleak, kazetarien aurrean egindako adierazpenetan, babes "sakonena" adierazi die Sevillako II espetxeko bizi baldintza zakarren kontra egiteko "borrokan ari diren" ETAko presoei.

Horren ildotik, Mariano Rajoyren Gobernuari "presoen kontrako indarkeria erabiltzeari utz diezaiola" eta "kolektibo horren kontra mantentzen dituen salbuespen neurriak bertan behera uztea" eskatu du. Gainera, alderdi politikoei "bestaldera begiratzera utz diezaiotela" esan die.