Politika -
Bake prozesua
Sortuk 'aurrerapausoak' espero ditu bake prozesuan
EH Bilduk hainbat proposamen aurkeztuko ditu bakerako eta elkarbizitzarako lantaldean PSEk blokeatutako lanean aurrera jarraitu ahal izateko.
Erredakzioa
Hasier Arraiz Sortuko presidenteak gaur iragarri duenez, ezker abertzaleak irailean hainbat iniziatiba aurkeztuko ditu Eusko Legebiltzarrean, ETAko presoen, erakunde armatuaren desarmearen eta biktima guztien errekonozimenduaren harira "aurrerapausoak" eman ahal izateko.
Radio Euskadin egindako elkarrizketa batean, Arraizek azaldu du EH Bilduk proposamen horiek bakerako eta elkarbizitzarako lantaldean aurkeztuko dituela PSEk blokeatutako lanean aurrera jarraitu ahal izateko. Izan ere, ezker abertzaleak "lurzoru etikoa onartu arte" eta ETAren jarduna gaitzetsi arte aurrerapausoak emateari uko egin zioten sozialistek.
Sortuko buruzagiaren arabera, irailean "gatazka konpontzeko prozesuan aurrerapausoak emango dira", ETAko presoen, erakunde armatuaren desarmearen eta biktima guztien errekonozimenduaren harira.
"Irailean zer edo zer aldatzea espero dut", esan du Arraizek, baina ezkor agertu da PP eta PSE alderdien jarrerekin, "Madrilgo irizpideen arabera" funtzionatzen dutelako.
"Madrilek aurrerapausorik ez emateko agindu die", horren esanetan, eta Euskadiko PP rol horrekin ez dagoela eroso gaineratu du.
