Alderdien erreakzioa, Barcinaren balizko inputazioaren aurrean

Nafarroako Parlamentuan ordezkaritza duten alderdi guztiek, PPk salbu, dimisioa aurkezteko eta hauteskundeak aurreratzeko eskatu diote Yolanda Barcina presidenteari, horren balizko inputazioaren aurrean.

Nafarroako Kutxako (CAN) ustezko dieta irregularrak ikertzen ari den epaileak Auzitegi Gorenera igorri du auzia ostegun honetan, Yolanda Barcina Foru Gobernuko presidentea inputatzea azter dezan.

Hauteskundeak aurreratzeko edota dimisioa aurkezteko eskatu dio Roberto Jimenez PSNko idazkari nagusiak Nafarroako presidenteari. Epailearen erabakiaren harira esan du erabakia aurreikus zitekeela eta Nafarroan egoera txarrean uzten duela "Barcinak auzitegiaren erabakiaren zain egon beharko duelako". Buruzagi sozialistaren iritziz, bi aukera daude: hauteskundeak aurreratzea edo Barcinak dimisioa aurkeztea eta inbestidura prozesu bat abian jartzea.

Maiorga Ramirezek (Bildu) nabarmendu duenez, epaileak auzia Gorenera bidalita, Barcinaren aitzakia demagogikoek ez dute tokirik eta "dagokion erantzukizuna bere gain hartu eta kargua uzteko garaia da". Ramirezen esanetan, herritarrek ez dute horrelako pasarteak jasatea merezi, izan ere, "Nafarroa ustelkeriaren erdigunean jartzen dute berriz ere".

Auzitegi Gorenak Yolanda Barcina inputatuko balu, Nafarroako presidenteak dimisioa aurkeztu edo konfiantza-galdera bati aurre egin beharko lukeela uste du Aralar-NaBaiko Patxi Zabaletak.

Jose Miguel Nuin Ezkerrako bozeramaileak Barcinaren dimisioa eskatu du, eta egingo ez balu, gobernu aldaketa behartzeko eskatu dio PSNri.

Manu Ayerdi Geroa Baiko legebiltzarkideak Yolanda Barcinaren "burugogorkeria" salatu du, dimisioa aurkezteari eta hauteskundeak aurreratzeari uko egiten diolako.