Gardentasunaren Legean sartzea eskatu du Errege Etxeak

Gardentasunaren Legean sartzeko "desira" azaldu dio Errege Etxeak Gobernuari. Horrela, Zarzuelako  langileen eta Gobernuko ordezkarien artean elkarrizketak izan dira "azken bi hilabeteetan", kontrolaren nondik norakoak zehazteko, Etxeko bozeramaileak batek azaldu duenez.

Errege Etxea Gardentasunaren Legean sartzeko ekimena Zarzuela Jauregitik abiatu dela adierazi du bozeramaileak.

Kontrolaren azpian jartzeari ez dio sekula uko egin Errege Etxeak, baina publikoki gaiaren inguruan galdetu diotenean, Parlamentuaren eskuetan zegoen erabakia zela argi utzi du Zarzuelak.

Errege Etxeko bozeramailearen hitzetan, kontrola noraino helduko den alderdi politikoek adostu beharko dute. Legearen azpian geratuko diren esparruak eta zeintzuk ez zehazteko, Etxeak proposamenik egin ez duela erantsi du bozeramaileak.

Gardentasunaren Lege proiektua uztailaren 27an onartu zuen Exekutiboak Ministroen Kontseiluan. Arauarekin herritarrek fondo publikoak kudeatzen dituzten karguak gehiago kontrolatzea nahi du Gobernuak. Baliabideak erabiltzeko arduradun publikoen erantzukizuna indartuko du legeak.

Gardentasunaren Legea Diputatuen Kongresuan dago. Adituek ekarpenak egin dituzte Kongresuko Batzorde Konstituzionalean, azken bi hilabeteetan.

Saenz de Santamaria

Bestalde, Estatuko Administrazioak Cristina infantaren abokatuak "ordainduko ez" dituela ziurtatu du Soraya Saenz de Santamaria Gobernuko presidenteordeak.

"Defentsako abokatu horiek ez ditu ordainduko Estatuko Administrazio Orokorrak, eta Estatuko zerbitzu juridikoak ez du defendatuko", adierazi du Saenz de Santamariak Ministroen Kontseiluaren ostean.