Politika -
Ourenseko Diputazioa
131 senide eta PPko kide bidegabe kontratatzea egotzi diote Baltarri
Fiskaltzak kereila jarri dio Jose Luis Baltarri Ourenseko Diputazioko presidentea zenean senitartekoak eta PPko zerrendagaiak kontratatzeagatik.
Erredakzioa
Ourenseko lehen instrukzioko lehen zenakiko epaitegiak ostegunean jaso du Jose Luis Baltar Diputazioko eta Ourenseko PPko presidente ohiaren aurkako kereila. 300 orritik gorako salaketa Fiskaltzak aurkeztu zuen Fiskaltzak abenduaren 28an, prebarikazioa egotzita, 2010ean egindako 131 kontraturen harian.
Kereilak Florentino Delgado Fiskaltzako arduradun nagusiak Diputazioko PSOEk jarritako salaketaren harian egindako ikerketa biltzen du. Salaketa 2010ean egin zuten sozialistek, eta Baltarren senitartekoei eta PPko zerrendagaiei egindako 100 kontratutik gora aztertzeko eskatzen zuten. Kontratu horiek Baltarren semea PPko presidente izendatu zuten Kongresuaren aurreko asteetan eta egunetan egin ziren.
PSOEren salaketa, Ourenseko Fiskaltzari aurkezteaz gain, Estatuko Fiskaltzari eta Ustelkeriaren Kontrakoari ere aurkeztu zieten, baina azken biek ikerketa baztertu eta Ourensekoaren eskuetan uztea erabaki zuten, Jose Arcos salatzaileen abokatuaren arabera.
PSOE, akusazioan
Ourenseko epaitegiak prozesua hasi bezain laster, PSOEk akusazio lanak egitea ala ez hausnartuko du, eta, kasu horretan, dokumentazio gehiago aurkez dezake; adibidez, Diputazioak berak egindako txosten bat. Bertan Jose Manuel Baltar semea PPko presidente izendatu zutenean, aitak aurrekontuan jarritako 30 milioi euroak baino 7 gehiago gastatu zituela agertzen da.
"Dokumentuak salatutako guztia berretsi egiten du eta Diputazioak Baltarren senideak eta PPko zerrendagaiak kontratatu zituela gaineratu egiten dugu, eta oraindik ere egiten dute, baina, noski, diru gutxiagorekin", esan du Jose Luis Ignacio Gomez Diputazioko sozialisten bozeramaileak.