Proud Boys taldeko bi kide 17 eta 15 urteko kartzela zigorrera kondenatu dituzte, Kapitolioko oldarraldiagatik

Proud Boys AEBko eskuin muturreko taldeko bi kide 17 eta 15 urteko kartzela zigorrera kondenatu dituzte, 2021eko urtarrilaren 6ko Kapitolioko oldarraldian izan zuten parte hartzeagatik.

Bietan zigorrik altuena, 17 urtekoa, Joe Biggs buruzagiak jaso du, sedizio konspirazioagatik. Fiskaltzak 33 urteko zigor eskaera egin zuen ia hilabete iraun duen epaiketaren hasieran. Akusatuak barkamena eskatu zuen epaiketan, eta ez dela terrorista nabarmendu zuen.

Bestalde, epaileak 15 urteko kartzela zigorra ezarri dio Zachary Rehl Proud Boys taldeko kideari. Fiskalak 30 urteko kartzela zigorra eskatu zuen horrentzat.

Zachary Rehl, Joe Biggs, Ethan Nordean eta Enrique Tarrio, Proud Boys taldeko liderra, maiatzean errudun jo zuten sedizio konspirazioa egotzita egin zieten epaiketan. Halaber, gaur eta datorren asteartean jakinaraziko dira Nordean eta Tarrioren aurkako zigorrak.