Mundua -
Analisia
EBk atea itxi nahi dio Irango petrolioari
Gaur hartuko dute Irango petrolioaren enbargoaren gaineko behin betiko erabakia, baina ez dago garbi zigor horiek Irango programa nuklearra geldiarazten lagunduko duten ala ez.
Jesus Torquemada
Europar Batasuna, Irango petrolioaren enbargoarekin, nahaspila batean sartzeko zorian dago. Iranentzat, ezbairik gabe, arazoa izango da europarrek petrolioa erosteari uztea. Iranek saltzen duen petrolioaren bostetik bat europarrei saltzen die.
Hala ere, europarrek erosten ez duten petrolioaren beste erosle bat aurkitzeko ez du askorik beharko. Txina, esate baterako, gero eta energia gehiago kontsumitzen du eta dagoeneko Iranen bezero ona da. Zenbait herrialde europarri, ordea, aldapa gora jarriko zaie Irani erosten dioten petrolioaren ordezkoa bilatzea.
Irango gordinaren menpekotasunik handiena dutenak Grezia, Italia eta Espainia dira. Okerren dagoena Grezia da, kontsumitzen duen petrolioaren erdia Irandik ekartzen du-eta. Baina arazorik handiena zera da: ez dagoela batere seguru Europak zigor hauekin lortu nahi duen helburua beteko ote duen ala ez. Alegia, Iranek bonba atomikoa sortzeko egitasmoa baztertzea.
Irango ayatolen irakurketa juxtu alderantzizkoa izango da. Errespetua jasotzeko modu bakarra arma nuklearrak lortzea denaren ideia berretsiko die EBren erabakiak.